支持巴西嗰份必胜决心

大球王子

近期球迷嘅视线集中喺洲际国家盃，今晚将上演最后两场波，重头戏当然係由巴西及西班牙合演嘅「梦幻决赛」，今场平手盘肥叔稍稍睇好巴西。一路有留意巴西比赛会感觉到，佢哋于今届洲际国家盃充满信心，好有决心喺班乡里面前威番铺，肥叔认为淨係呢份决心都值得支持，加上球星尼马弗到漏油，西班牙班后防都咪话唔惊。西班牙方面整体实力係高，不过可能近年太过顺风顺水，所以踢落有啲「嚣」，而佢哋刚啱同意大利恶战120分钟，球员搏到残晒兼比巴西少1日休息，唔多唔少都会影响到发挥，作客环境下想赢更加难。

例行公事意国唔上心

季军战由乌拉圭对意大利，乌拉圭应该高过意大利少少。主要原因係意大利伤兵太多，今场焗住要派好多副选落场。加上意大利一向都对「例行公事」唔多上心，今场输埋唔出奇。虽然话乌拉圭唔算係乜超级劲旅，但胜在几个前锋级数高，要攻破对手大门唔难。另外仲有一点要留意，因双方球员已经放低晒心理包袱，压迫性必定降低，对于提升入球数字会有帮助。